| |
1. ÖLƏN – ÖLMƏYƏN
Diş düşür.
Sifət qırışır.
Bədən çürüyür.
Ruh düşmür.
Ruh qırışmır.
Ruh çürümür.
Adam ölür.
İnsan ölmür.
2. HƏYAT XİDMƏTİ
Adam ölümə layiqdir.
Ancaq Adamın İnsan olmaq imkanı var.
Ölüm İnsana yaraşmır.
Bu səbəbdən də Həyat Adamdakı İnsanı öldürməyə çalışır.
Həyat ölümə xidmət göstərir.
3. HEYVANLIQ – İNSANLIQ
Cinsi münasibət vasitəsilə Adam cismani Ata olur.
Cinsi münasibət vasitəsilə Adam cismani Ana olur.
Cismani Ata olmaq üçün Adam əvvəlcə heyvan olur.
Cismani Ana olmaq üçün Adam əvvəlcə heyvan olur.
Ruhani Atada heyvan ölür.
Ruhani Anada heyvan ölür.
4. FƏRQ
I
Həyat Adamı olur – həyat İnsanı olmur.
Amal İnsanı olur – amal Adamı olmur.
II
Adam – heyvan təzadı olmur,
İnsan – heyvan təzadı olur.
III
Adam heyvandan fərqlənir,
İnsan heyvana qarşı durur.
IV
Ömrün çox hissəsində – Adam Heyvana yaxın olur, az hissəsində – İnsana.
V
Adam Heyvana bənzəyir, İnsan özünə.
VI
Həyat Heyvana Yarayır, adamı Yarıdır, İnsana Yaramır.
5. AZLIQ
Hər Adamda bir az İnsanlıq var!
Ancaq bu “bir az” o qədər azdır ki!
6. SƏCİYYƏLƏR
Adam – Heyvandan üstün.
İnsan – Adamdan Üstün.
Adam – törəyir.
İnsan – yetişir.
7. TƏRİF
İnsan – Adamdar.
8. BİÇİM
Həyat Adamın boyuna biçilib, bu səbəbdən də İnsanın boyuna çatmır.
9. TƏHLÜKƏ
Adamlıqda Səhlləşmək təhlükəsi var.
10. İKİSİNDƏN BİRİ
Yuxudaydım: Adamı İnsan sanırdım.
Ayıldım: gördüm ki, Adam heyvan olub.
Adam İnsan olmayanda heyvan olur.
11. ADAMLAR
Quldur da Adamdır.
Cəllad da Adamdır.
Qatil də Adamdır.
Əyyaş da Adamdır...
İnsandan başqa hər kəs Adamdır.
12. ADAM YÜKÜ
“Niyə belə yavaş addımlayırsan, Adam?”
“Yüküm ağırdır. Daxilimdə bir bölük heyvan daşıyıram!”
13. ADAMDA YAŞAYANLAR
Adamda Yırtıcı yaşayır, Xudbin yaşayır, Xain yaşayır, Həris yaşayır, Erkək yaşayır, Dişi yaşayır.
Adamda Antiinsan yaşayır!
14. ADAM MƏĞRURLUĞU
Mənəmlik.
15. İNSAN MƏĞRURLUĞU
Mənlik.
16. ADAM ƏZƏMƏTİ
İmtiyaz.
17. İNSAN ƏZƏMƏTİ
İnam.
18. MƏRHƏLƏLƏR
Heyvanlıq – sürülük.
Adamlıq – ictimailik.
İnsanlıq – ruhanilik.
19. ƏSRİMİZ
Adam çoxluğu – insan qıtlığı.
20. TƏZADLAR
Adam – zorlu.
İnsan – nurlu.
Adam – həvəsli.
İnsan – eşqli.
21. DÖVRLƏR
Adamın canavar dövrü olur, ilan dövrü olur, tülkü dövrü olur, qoyun dövrü olur...
İnsanın təkcə İnsan dövrü olur.
22. MƏNŞƏ
Adam Doğulur – İnsan Yaranır.
23. TƏRİF
Həyat – Adamın Bağçası, İnsanın Səhrası.
24. EVLADLAR
Heyvan – Təbiətin Evladı,
Adam – Həyatın Evladı.
İnsan – Ruhun Evladı.
25. FƏRQ
Zəmanə Adamı olur, Zəmanə İnsanı olmur.
26. DÖYƏN – DÖYÜLƏN
Şər Adamın əliylə Döyür, İnsanın əliylə Döyülür.
27. CƏMİYYƏT
İnsan – dustaq.
Adam – gözətçi.
28. İNSAN DAĞI
Sinəyə çəkilən Dağdan möhtəşəm Dağ varmı?
29. SAYILMAYAN
Adamın dərisini soymurlar,
Adamı çarmıxa çəkmirlər,
Adamı tonqalda yandırmırlar...
Adamı İnsan saymırlar.
30. GEN DÜNYA – DAR DÜNYA
Adam üçün Dünya gendir!
İnsan üçün Dünya dardır!
31. BÖYÜMƏ
Bəşər Məxluq kimi sürünür,
Adam kimi iməkləyir,
İnsan kimi yeriyir.
32. ADAM LƏYAQƏTİ
Elə Adam görmüsənmi ki, üzdə bir cür, arxada başqa cür danışmasın?!
Elə Adam görmüsənmi ki, bəd ayaqda qaçmasın?!
Elə Adam görmüsənmi ki, varidata alçalmasın?!
Elə Adam görmüsənmi ki, mənsəbə uymasın?!
Elə Adam görmüsənmi ki, şəhvətə şirnikməsin?!
Elə Adam görmüsənmi ki, İnsan olsun?!
33. ZƏMANƏ ÇAYI
Adamın başından yuxarı, İnsanın dizindən aşağı.
34. YAŞAYIŞ
Adam Həyatda yaşayır, İnsan Həyatın əhatəsində.
35. FƏRQ
Adam – maddiyyatçı.
İnsan – İdealçı.
36. BİÇİM – MƏZMUN
Doğuluş, Həyat, Ölüm – Biçimdir.
Amallaşma, Sabahlaşma, Mütləqləşmə – Məzmundur.
Adam Məzmuna çatmır, Biçimdə qalır.
İnsan Məzmuna çatır.
37. İQTİDARSIZLIQ
Təbiət Yer yaratdı, Göy yaratdı, İnsan yarada bilmədi.
38. XOŞBƏXTLİK – İNSANLIQ
Xoşbəxt olmaq üçün İnsan olmaq lazımdır.
Adamlar xoşbəxtliyin nə olduğunu bilmirlər.
İnsan olmadan xoşbəxt olmaq istəyirlər.
39. FƏRQ
İnsan Dünyadadır, ancaq Dünyanın deyil.
Adam Dünyadadır və Dünyanındır.
40. MƏNŞƏ
Adam – heyvanın davamıdır.
İnsan – heyvanın ölümü.
41. FƏLAKƏT
Adam daşlarından cəmiyyət Binası tikirlər və Bina uçub tökülür.
42. ADAMLAŞMAQ AQİBƏTİ
Hamı Adamdır və buna görə də heç kəs İnsan deyil!
43. ÇEVRİLMƏ
Adam heyvanlıqdan imtina edəndə Adam olmur, İnsan olur.
44. BƏŞƏR HEKAYƏTİ
Məxluq oldu,
Adam ola bildi,
İnsan ola bilmədi.
45. MÜQƏDDƏS İMKAN
Bəşərin bəşər olması.
46. TƏZAHÜRLƏR
Adam – gizli, İnsan – aşkar.
Adam – zahiri, İnsan – daxili.
47. HAL
Ətrafımda Adam dənizi gurlayır.
Daxilimdə İnsan bulağı qaynayır.
48. HƏYATLA TƏMAS
Adam Həyata yüksəlir, İnsan Həyata enir.
49. FƏRQLƏR
I. Adam Fərqi
Meymun kimi təqlidçi.
Canavar kimi amansız.
Tülkü kimi bic.
Bir az da İnsan.
Bu bir az İnsanlıq Adamı Heyvandan fərqləndirir.
II. İnsan Fərqi
Meymundan azad.
Canavardan azad.
Tülküdən azad.
Adamdan uca.
50. TƏHLÜKƏ
İtdən, pişikdən, canavardan, ilandan, tülküdən seçilməmək təhlükəsi var İnsan Həyatında.
51. CƏNNƏT – CƏHƏNNƏM
Adam üçün cənnət sayılan nə varsa – İnsan üçün cəhənnəmdir!
52. ADAM MƏHKƏMƏSİ
Zahiri çirkinlik bağışlanmır,
Daxili çirkinlik bağışlanır.
53. NATAMLIQ – TAMLIQ
Adam İnamında İnamsızlıq var.
Adam İdrakında İdraksızlıq var.
Adam Mənəviyyatında Mənəviyyatsızlıq var.
Adam İradəsində İradəsizlik var.
Adamlıq – natamlıqdır.
İnamlı olmaq üçün İnsan olmaq gərəkdir!
İdraklı olmaq üçün İnsan olmaq gərəkdir!
Mənəviyyatlı olmaq üçün İnsan olmaq gərəkdir!
İradəli olmaq üçün İnsan olmaq gərəkdir!
İnsanlıq – tamlıqdır!
54. FƏRQ
Adamda Ayıblı nə varsa, Adam ondan Törəyir.
Adamda Abırlı nə varsa, İnsan ondan Törəyir.
55. QAYĞI
Bir İnsani Qayğı var – İnsanlaşmaq!
56. TƏRİF
Adam – nəşədən törəyən.
İnsan – əzabdan yaranan.
57. CƏMİYYƏT
Cəmləşən Adamlar – Təkləşən İnsanlar.
58. NAŞILIQ
Adamı İnsan sayıb sevirlər.
İnsanı Adam sayıb sevmirlər.
59. FƏRQ
Adam yüz cür yaşayır, İnsan bir cür.
60. AQİBƏT
Faciədə adam məğlub olur, İnsan qələbə çalır.
61. SƏCİYYƏLƏR
Həyat – Adam istehsal eləyən Fabrik.
Amal – İnsan yaradan Emalatxana.
62. ADAM – XALQ
Adamların daxilində İnsani nə varsa – Birləşir və Xalq yaranır.
Adamların daxilində heyvani nə varsa – Birləşir və Antixalq törəyir.
Adam – həm Xalqdır, həm də antixalq.
63. XOŞBƏXTLİK – BƏDBƏXTLİK
Xoşbəxt Adam olmur.
Bədbəxt İnsan olmur.
|
|
